Previous Tab
Next Tab

第十八屆全港大學划艇錦標賽

當大家(包括筆者)譴責天文台,並祈求聽朝冇10號都留返個8號風球嘅時候,26屆嘅隊友就失去一整日練艇嘅時間,仲要擔心聽日有冇得練,因為仲有唔夠兩個禮拜就係八大!即係下個禮拜六日(8月4至5號)!

都係嗰句,出賽陣容講你都唔識,共通點係呢班人同當年嘅你一樣熱血激昂,付出一個暑假去準備一場比賽。聽聞今年男女子隊都人數特別眾多,以重奪男女子隊冠軍為目標!又因理大啱啱搬埋過黎新艇會,到時碼頭艇倉布架厠所樓梯汽水機設施可能會緊張d,兩大U Team困獸鬥氣氛可想而知。所以,26屆划艇隊需要你嘅支持!

需要嘅支持照舊包括:應援團,搬艇隊,洗艇隊,打雜團,機佬,觀眾。往年因吝嗇肥肉或怕影響市容而未敢穿著黃戰衣嘅校友,今年唔好怕醜,支持隊友又好,懷緬點滴又好,聚舊吹水都好,搵返件陳年黃戰衣亮相,一齊將艇會染成一片黃海,見證中大划艇隊十一連勝!

P. S. 想踩單車睇比賽嘅校友,要注意:

1. 每年八大當日都會有人炒車,所以記得先買保險。
2. 法例上大家應該踩單車徑,江湖傳聞今年有教練收到告票。
3. 唔好見單車就“借”,教練有絕對優先需要,可以嘅話去沙田大圍大水坑租單車。
4. 盡量踩單車群後面,唔好阻街。
5. 打氣叫喊嘅時候先睇睇教練面色,唔好遮左教練把聲。有記綠以黎應該得一位教練冇呢個問題。
6. 勸你嘅親朋戚友當日唔好去沙田踩單車。

 

Copyright 2013 © CUHK Rowing Team Alumni Association. All rights reserved. 版權所有 不得轉載