Previous Tab
Next Tab

爭取連續12年全場總冠軍!

連年OC唔係必然,今日嘅初賽一d都唔輕鬆,我地18條艇入面只有14條入決賽,係近十幾年最少嘅一年。今日再一次令我地明白冇贏梗嘅比賽,呢14條艇聽日堅負重任,爭取OC當然重要,希望各位隊友一齊無悔完成呢個暑假!加油!

時下年青人真係好難理解,比賽前一個禮拜當然要好好休養,教練要求禁慾好合埋,隻手扒艇扒到爛晒亦都唔舒服,90後憤青唔理解教練,仲要搵隊友出氣就真係唔啱。不過唔好人生攻擊,佢地仲要比賽,你最多可以話佢地ON BOAT!

 

 

後生仔ON BOAT BOAT,老野都應該生性,因自卑而唔敢著戰衣冇人會怪佢,要晒太陽而除衫就要表起佢,要晒命而除衫就最不該!聽日教練仲係咁鍾意晒嘅話,我地會幫佢晒埋成對腳!

 

第十九屆全港大學划艇錦標賽

是咁的,今年八大黎緊禮拜六日就到(8月10至11號),係時候拎返件黄戰衣出黎,睇下仲著唔著得落。

記得預時間睇最後一場,教第10年艇嘅文總最後一次做單身舵手,特別感觸,根據黑柴經驗,bachelor cox寧舍不同!趕唔切睇最後一場都要睇尾二嗰場,兩條full train女八,艇上面18個女仔一樣樣,完全分唔到邊個打邊個,不過個個都堅抽!

即係咁,十場比賽其實都好重要而又需要大家支持,又由於八大同中大盃組織同規模都唔同,所以冇現場直播。所以,都係黎城門河捧場啦,支持27屆中大划艇隊!

CU CU CU GO!

決賽時間:

0900 W2X
0915 W4-
0930 M1X
0945 M4+
1100 M4-
1115 W4+
1130 M2X
1145 W1X
1315 W8+
1430 M8+

踩單車小貼士:

﹣著返件黄戰衣,租返架單車踩,即刻後生幾年,除非你進化得特別快,一般黎講班crew都會以為你畢業冇耐。
﹣出車前試下個brake先,俾人隊屎忽係很慘的。
﹣切勿跟車太貼,尤其是前面條友都係著黄戰衣。
﹣著黄戰衣踩行人路者,輕則食牛肉乾,重則網上欺凌再搞埋你公司。
﹣睇女子隊比賽嘅,可以盡情吶喊打氣,唔使驚遮左教練把聲,男子隊不在此限。

 

2013沙田龍舟競賽

每逢端午,划艇人總會有機會被身邊嘅人問候一聲:「喂你練咁耐係咪要端午節扒龍舟?」接住就要費幾番唇舌去講解划艇同龍舟其實係兩件事,好似要同龍舟劃清界線咁。點知依家咪又係成班划艇隊嘅老野走去扒龍舟,又好難怪人地分唔清。

話說今年端午,由跨左十幾屆組成嘅龍鳳艇,本住有儲過下鐘嘅精神去參加沙田體育盃呢一場,諗住一場決賽爆哂俾佢,誰不知個start都未做完,我地就遇上撞擊事故!原來係友校嘅龍頭吉左去我地條龍尾度,再引致我地指埋另一條龍嘅屎忽度(原理就好似篤波咁)。因強烈撞擊嘅關係,我地連龍頭都甩埋(可見我地有幾快),睇住個頭就咁隨水漂走,感覺真係落寞。經歷完連環撞擊之後,差d跌埋落水嘅舵手德穎(14屆)同鼓手阿的(15屆)依然處變不驚,繼續帶領我地前進,完成左六百米嘅賽事。

呢個龍舟比賽又再一次話俾大家知,人生無常。

最後只能以「意外係比賽嘅一部分。」作結。

賽後,親愛嘅大輝(12屆)為振奮士氣,請左大家食馳名嘅龍華酒家。不過途中比賽大會送嘅乳豬都冇眼睇,四個壯丁一齊托住居然都可以成隻反左喺路中心,仲要俾人踩豬頭,咁又冇左隻豬。

特別鳴謝: 為我地影相嘅Terence(18屆),把守住我地廿幾人財物嘅Stella(21屆),同埋專誠黎睇比賽嘅Vincent(15屆)一家。

警察挑機?!

近日收到警方電郵,當堂嚇到龜縮,以為輪到我地被低調通輯!話晒上當年隔離U成日聲浪過大擾民,又喺行人路踩單車,又唔交會費續証,唔填出艇表,夜晚唔裝艇燈又遲返碼頭,唔跟航道,唔睇後,洗艇唔乾淨,沖涼爭水喉,好易點錯相以為係我地架嘛!

睇清楚之後縮得仲犀利,警察歷險會今年搞嘅拉機賽想邀請我地一齊玩,原來警察除左識拉人之外仲識拉機!佢地俾人挑機都算挑得多啦,今云黎挑我地機,一齊玩嘅仲有消防海關入境懲教。我地認為今次好有可能係針對大傑(13屆)同佢班拉機怪,佢地成日喺九公KO紀律部隊,應該一早結怨。嗱,怨有頭債有主,成日去九公玩班怪獸唔好龜縮!

拉機部隊緊急招兵!越肥越好!7月13號禮拜六下晝比賽,7月2號deadline,有4 x 500,有5 x 3分鐘,費用全免!組團搵馬仔。

 

 

扒龍舟谷爆朱古力肌

龍舟訓練已經接近尾聲,阿嶠(23屆)話俾大家知,要練到張家輝咁大隻,唔使日食30隻蛋嘅,扒龍舟一樣得!成功非僥倖,上當年練艇都冇咁大隻,食瀨尿牛丸又冇用。今日嘅阿嶠可謂苦盡甘來,個人明顯高左,大隻左,自信心返晒黎!可見我地有幾咁認真,絕對唔係頹練嘅。

之不過,一樣米養百樣人,艱辛嘅訓練並唔係每個人都頂得順,舊人都有軟弱嘅時候,尤其是眼見自己練得咁足但係肚腩依然冇退縮,操舟豐富嘅某隊員竟然一度老淚縱橫,仲想投河自盡。大輝,我地點可以遺棄你呢?by the way,唔該科學d,搵條繩綁住條腰唔work架,下年不如渣少d灘好過啦。

 

 

 

 

 

 

Copyright 2013 © CUHK Rowing Team Alumni Association. All rights reserved. 版權所有 不得轉載