Previous Tab
Next Tab

2013 Head of the Bay 熨波洲之旅

每年唯一一個唔喺城門河嘅划艇比賽Head of the Bay,已經喺4月7日舉行左,由於呢個比賽唔使有membership,所以每年都有好多alumni黎玩,順手黎飲下啤酒燒下野食扮下鬼佬。

Single,double,4+,mixed 4+都見到我地CU Rower嘅影子,以為班alumni會唱住歌扒出大海,欣賞下海洋公園過山車就返黎,點知佢地好似好落力,完全唔hea,好似好耐無發洩過咁,亦可能係因為大風吹到好凍,想比力d 黎暖返個身。其實Head of the Bay最大挑戰應該係個舵手,因為航道唔明顯,分分鐘帶領成艇人蕩失路,仲要轉幾個90度嘅彎,真係幾難!

成績方面對住班牛高馬大鬼佬,都有d 牌仔拎下,其中有場Open M4+,我地好犀利咁用其中一條四作自殺式襲擊,將條鬼佬艇個rigger撞甩左,其實係班鬼佬快得濟衝左埋去我地條艇度,但亦因為咁鬼佬艇棄左權,做就左我地另一條艇贏左,Head of the Bay獎品出名豐富,e.g. CK sunglasses, CK underwear 咁,而今年獎品就係condom!

誠意推介下年要再玩Head of the Bay,仲要認真咁練,睇下下年獎品係咩!

第159屆兩大划艇賽!

The Boat Race係英國嘅兩大啫,被我地仿效嘅牛津劍橋划艇對抗賽今年已經係159屆,講俾你知唔係因為佢地係英國佬,係因為冇佢地搞得咁出色就冇我地,家陣人地閒閒地有二三十萬人睇比賽,即係睇煙花咁多人!我地雖然爭成百幾年,黎緊27屆,但係唔好睇少短短廿幾年,北大清華對抗賽搞左10年就停辦,被河蟹了。

講返比賽,今年比賽唔算好激烈,牛津6.8k由頭帶到尾嬴一條艇有多。比賽片段未open,有興趣嘅可以睇住BBC報導先。最新戰績係81對77,何其緊湊,加埋唔啱數?因為有一年同時衝線,賽和!

聽講今年港大同科大會搞第一屆嘅港大科大兩大賽,唔好問點解,大家加油啦。

P.S. 睇wiki值得分享嘅係原來英國都有個黃興桂。The most famous commentary on The Boat Race featured BBC radio commentator John Snagge who, his voice filled with excitement during the 1949 staging of the event, reported: "I can't see who's in the lead but it's either Oxford or Cambridge".

準27屆集訓

Training Camp

唔好輸在起跑線(即係執輸行頭慘過敗家),呢一句邊到都用得著。供養過現代教育嘅你,或者踢過仔女讀幼稚園面試準備班嘅你都應該深明此道。緊隨住尖子同三三四早一年入U嘅潮流,划艇隊都要行先人地一步!

為左迎接競爭越黎越激烈嘅大學賽,划艇隊又有新招,之前中大盃改喺1月搞,原來係要班書院新仔新女早d歸大隊。呢大隊人入面有幾多會繼續留低就暫時未知,暑假訓練有幾甘就你同我都知,就喺黎緊嘅校隊選拔之前嘅復活節,划艇隊帶晒一班新仔新女北上肇慶集訓。

四日三夜困獸鬥,日以繼夜夜以繼日係咁練,咁咪好勁?教練話”OK啦“(即係冇答)。暑假開操睇下有幾多人留低就知龍與鳳。

龍舟開操

10年前我地恃住城門河上嘅少少成績,見人地龍舟又嘈又多人又扒得慢仲要搞到條河鬼咁大流,就踩場玩埋一份,結果損手爛腳,多次未能完成賽事,包括翻船,撞船,扒到一半失控調頭扒返起點,諗住試下西貢又因為miss左報到時間搞到兩條艇冇得比賽,淨返一條都扒唔直俾人DQ,諗起都心酸。近幾年隨住港姐質素每況愈下,龍舟活動都越搞越少人黎反,上年最終乜都冇搞。

大輝吹雞

今年,扒龍舟都crab槳嘅大輝(12屆)話要重震龍舟,既然大輝吹雞,我地就膽粗粗租左條船試下練足幾個月,睇下可唔可以重振香港中文大學划艇隊校友會龍舟隊!黎緊到6月嘅禮拜六下晝,我地會喺沙田或者西貢練艇,確實時間留意我地個facebook page,由於上個禮拜幾乎坐爆條船,麻煩各位每個禮拜六前搵班搞手confirm。

  • 搞手一:大煇(12屆)
  • 搞手二:馬仔(19屆)
  • 搞手三:Ricky(20屆)
  • 搞手四:阿嶠(23屆)
  • 搞手五:阿強(24屆)
  • 搞手六:阿朱(25屆)

除左正日會報沙田比賽,我地仲報左尖東嘅國際龍舟邀請賽,所以係堅操,選拔詳情容後安排。另外,歡迎帶埋你地嘅朋友一齊黎,可以帶女朋友,不過最好叫佢帶埋佢嘅朋友黎。

 

2013 Head of the Bay

上次miss左coastal rowing唔緊要,Yacht Club話今年好多比賽,有排你玩,黎緊4月7日有Head of the Bay。

有單槳有雙槳,有5k有2.5k,有open有master,詳情睇race notice。根據經驗,短途風平浪靜,老野實扒到嘔,既然報名費一樣,不如扒長d!open/master分別亦不大,你睇下Yacht Club有幾多個唔係master(master A 27歲或以上)。

唔好理咁多,有興趣嘅,禮拜三(27號)之前搵24屆強哥報名先。由於強哥仲未完全走出陰霾,報名嗰陣千祈唔好提“Shing Mun Head”、“大浪”、“危險”、“沉船”、“怒海漂泊”,”報警“、“等待救援”、“蘋果“等字眼。

 
Copyright 2013 © CUHK Rowing Team Alumni Association. All rights reserved. 版權所有 不得轉載