Previous Tab
Next Tab

Shing Mun Head 2013

Whatsapp收嗰8蚊實在物有所值,今日同時間收到幾個whatsapp,原來大家睇到划艇新聞反應真係會大過財政預算埃及熱氣球意外同埋辛辣招,最出奇嘅係原來有人會睇星島即時新聞...

報過平安先,Filippi冇斷,除左舵手要逃避傳媒追訪之外,其餘8人都安然無恙,一齊沉嘅BU都一樣有驚無險。玩沉船上蘋果冇問題,凍冰冰祭河神都可以乘機求下風調雨順,上到黎冇熱水沖涼就真係灰晒。艇會會費8蚊都嫌貴!

再一次引證,後生仔經唔起風浪囉...

        

渣打香港馬拉松2013

畢業之後件戰衣擺喺度又嫌阻掟,掉左佢又唔好意思,扒左幾年艇就仲煩。與其喺屋企當睡衣著,不如跑渣打著住佢,呢位中左槍嘅仁兄就係最佳示範!

原來每年唔少隊友都支持呢個運動,龍友阿吉(18屆)都會黎認下人,今年龍友跑埋一份,替工阿佳(15屆)補上。雖然遲左起身,但係都堅持等埋跑全馬1組仲要跑成6粒鐘嘅17屆某隊友,連校長企喺隔離都費事啋佢,始終背心熱褲吸引d。

要喺幾萬人入面搵到你實在唔容易,今次只係執到幾件,今年搵唔到你唔緊要,下年麻煩各位將近照,跑姿,參賽組別,預計完成時間send俾我地,或者直接d著住件戰衣跑(asics件黄背心唔算)。

不過要企到腳跛睇到眼矇,阿佳話下年一定報返渣打跑。

更多...

元老團年

每年新仔入到team認到中學師兄師姐甚至阿sir/miss時有所聞,男女隊員拍拖結婚生仔隔幾年都有一單,原來仲有人搵到姨媽姨丈!阿琛(26屆)呢次帶我地認識翁義(6屆)同Elsa(7屆)以及一班老鬼。

呢班友扒完艇廿幾年都仲緊密聯繫,聽起黎就好似幼稚園同學聚會咁不可思議,Nelson(4屆)前嗰排就搞左餐團年飯俾呢班第1至8屆嘅老鬼聚下,校友會亦厚住臉皮不請自來一睹划艇隊鼻袓,聽下佢地話當年。

記性好嘅隊友可能記得頭兩屆中大盃有一條志在參與艇,同埋有個老細贊助左一大堆毅成體育用品,呢班叔叔呢幾年轉行走左去行山,據非正式統計應該係行毅行者最快嘅一班中大划艇人(20個鐘樓下,即係宇欣級數!),所以個個都keep到好fit!原來扒完艇暴脹脫髮都唔係必然。

話時話,望住女子隊始袓Cecilia同阿琛嘅合照,點睇都唔似爭25年...

Anyway,認住呢班哥哥姐姐,第日買樓買體育用品睇醫生見工記住撻朵(遊行示威除外)。

更多...

 

第九屆中大盃LIVED!!!

比賽有現場直播大家果然特別落力,真係有人扒到嘔,而且今年冇老鬼crab槳!男八分開3場比賽,前排24屆幫fresh grad爭返啖氣,以1秒之差力壓23屆勝出,中段17屆主將扒到嘔都輸1秒俾22屆得梗頸四,扒左8年終於冇牌攞,殿後遊船河嘅19、20屆好彩夠腳,令18屆唔使再包艇。女八做完個start都勝負已分,24屆甩晒出黎贏到開巷,跟住到20、21、22屆第二,12、17、19屆寶刀未老得第三,23、24、25屆magic竟然冇牌攞,承讓承讓,16、18屆敬陪末席,慢過快艇,相都冇乜幾張。

比賽片段整理當中,轉頭post埋出黎,猴擒嘅睇住raw先

離奇嘅係,頭3名女八時間快過晒所有男八,投訴都冇用,唯有賴水流,當年食軟飯嘅傳聞似乎有跡可尋。比賽結果唔重要,扒完上黎100位校友飲飽食醉,冇艇扒嘅都帶埋老婆仔女享天倫,實行一年一度中大划艇校友日!

九院賽方面,NA努力多年,今年撒換教練之後終於贏得男子隊冠軍,Shaw就重奪女子隊冠軍,全場總冠軍由人強馬壯嘅Shaw冧莊,亦係9年黎贏得最多OC嘅college。唔好睇少新書院人丁單薄,晨興書院總成績得第4!教練肯定要請食飯啦!

Race Results

更多...

 

Energy 划

踏入萬眾期待嘅中大金禧年,我地響應宇欣同Natalie校友嘅2013中大見,喺「香港中文大學五十周年校慶啟動典禮 ‧ 健步行暨嘉年華」嘅嘉年華擺左檔「Energy 划」,將最好玩嘅划艇機推介俾校友。

全場最正嘅雙人划艇機差唔多全日冇停過,雖然有唔少校友,中大學生,中學生黎挑機,但係最捧場嘅始終係小朋友,當中有划艇隊校友帶埋小朋友黎開操,小朋友拉機,老豆踢機。好嘅划艇技術可能越早練越好,我地當然落力教授,為左迎接十幾年後嘅隊員,我地唯有叮囑努力讀書!

 50周年校慶校友慶祝活動

更多...

 

Copyright 2013 © CUHK Rowing Team Alumni Association. All rights reserved. 版權所有 不得轉載