Previous Tab
Next Tab

第十八屆全港大學划艇錦標賽

當大家(包括筆者)譴責天文台,並祈求聽朝冇10號都留返個8號風球嘅時候,26屆嘅隊友就失去一整日練艇嘅時間,仲要擔心聽日有冇得練,因為仲有唔夠兩個禮拜就係八大!即係下個禮拜六日(8月4至5號)!

都係嗰句,出賽陣容講你都唔識,共通點係呢班人同當年嘅你一樣熱血激昂,付出一個暑假去準備一場比賽。聽聞今年男女子隊都人數特別眾多,以重奪男女子隊冠軍為目標!又因理大啱啱搬埋過黎新艇會,到時碼頭艇倉布架厠所樓梯汽水機設施可能會緊張d,兩大U Team困獸鬥氣氛可想而知。所以,26屆划艇隊需要你嘅支持!

需要嘅支持照舊包括:應援團,搬艇隊,洗艇隊,打雜團,機佬,觀眾。往年因吝嗇肥肉或怕影響市容而未敢穿著黃戰衣嘅校友,今年唔好怕醜,支持隊友又好,懷緬點滴又好,聚舊吹水都好,搵返件陳年黃戰衣亮相,一齊將艇會染成一片黃海,見證中大划艇隊十一連勝!

P. S. 想踩單車睇比賽嘅校友,要注意:

1. 每年八大當日都會有人炒車,所以記得先買保險。
2. 法例上大家應該踩單車徑,江湖傳聞今年有教練收到告票。
3. 唔好見單車就“借”,教練有絕對優先需要,可以嘅話去沙田大圍大水坑租單車。
4. 盡量踩單車群後面,唔好阻街。
5. 打氣叫喊嘅時候先睇睇教練面色,唔好遮左教練把聲。有記綠以黎應該得一位教練冇呢個問題。
6. 勸你嘅親朋戚友當日唔好去沙田踩單車。

 

蛇齋餅糉系列 之 秋風起 三蛇肥

今年興蛇齋餅糉,但係各大蛇竇都full晒,我地唯有book下年,俾大家一嘗蛇宴滋味,順便食個團年飯。

冇專車接送,飯前冇活動,而且要俾錢,保證餵飽你。

日期:1月15日,星期日(年廿二)
時間:1930(歡迎遲到)
地點:灣仔駱克道368號百玲大廈2樓汽車交通運輸業總工會(冇泊車優惠,唔識去問google)
價錢:180(含行政費用)
報名:德穎(9463 0403),Natalie(9870 5675),馬仔(6159 6770),或者email俾我地

有蛇有雞有羊,蛇酒啤酒汽水任飲,圍數有限,手快有手慢冇!

 

廿五屆划艇隊不負眾望成功衛冕兩大賽冠軍!

今年校長史無前例喺熱身嘅時候就黎打氣,實在令人受寵若驚。

比賽一樣精彩,女子隊拋離3隻艇位勝出,男子隊則以3秒勝出(即係唔夠一隻艇位),嗰3秒可能係靠校長打氣打出黎。多謝校長!

廿五屆隊員完成歷史任務,為男女子隊奪得歷來第5個永久盃(即係兩個永久盃),現時中大對港大比數為男子隊19比6,女子隊18比5。

廿五屆嘅暑假成績總算美滿,但係今年賽季仲未完!中大划艇隊將會喺10月遠征吉隆坡,係一行28人!想睇比賽或者想請大家睇比賽嘅唔該單聲。

 

第二十五屆香港兩大划艇賽

仲未完結,我地仲有一場比賽。

冇嬴梗嘅比賽,根據往績,我地嘅男八喺最近3次輸俾港大嘅暑假裡面,都嬴左大學賽金牌,女四上年更加係side足全程先嬴到(全程爭唔夠半個位)。所以,唔好睇小呢場比賽。

今年係男女子隊同時爭取永久盃嘅一年,意義重大。

想睇比賽嘅,黎緊嘅禮拜日(9月4日),舊艇會見。記住著黄戰衣,廿五屆需要你地嘅支持。

﹣10:30    開幕
﹣10:40    熱身
﹣11:00    女四
﹣11:20    男八
﹣12:15    頒奬

中大加油!

中大划艇伴你廿五載

中大划艇隊廿五週年聚餐順利完成,有賴每一位隊友支持,多謝各位!

閱讀全文:

Copyright 2013 © CUHK Rowing Team Alumni Association. All rights reserved. 版權所有 不得轉載